तशी उलघडली मला आज आई - गद्य कविता. Marathi Poem - ThinkBigReshma

सुगंध पसरवित जशी उमलली जाई 

अशी उलघडली मला आज आई

'आ' म्हणुनी आत्मा जागविला 

'ई' म्हणुनी ईश्वर भेटविला 

आत्मा जागवणारि ईश्वरी दाती ती होई 

अशी उलघडली मला आज आई

सहन करी ती भार कुकर्माचा 

अत्याचार सोसे पोटच्या बालकांचा 

तरी न कोपे ती वसुंधरा माई 

अशी उलघडली मला आज आई

असंख्य पापांनी माखलेले आयुष्य आमचे 

पावन करुनी ती, अविरत धुवत असे 

स्वतः मलिन होउनी, पुण्यदाती गंगा ती होई 

अशी उलघडली मला आज आई

कोटी देव सामावुनी पोटी

सात्विकतेचे दान घालिते ती ओटी 

झरा वात्सल्याचा सदा पाझरता ठेवती ह्या गाई 

अशी उलघडली मला आज आई

यवन अत्याचाराचा झाला कहर

लोपले निति-धर्म-सत्व, अंधाराचा प्रहर

घडवुनी शिवराय, जिजाऊ तप्त तेजसूर्य देई 

अशी उलघडली मला आज आई

अवघड जी वाट रांगड्या मर्दांना 

सहज उतरुनी ती जाई,

कापुनी कड्यांना ममतेचा पराक्रम हिरकणी गाजवुनी राही 

अशी उलघडली मला आज आई

पारतंत्र्याच्या बेडीत स्वतः अडकुनी 

जागविला पुरुषार्थ लेकरांच्या मनी 

आज ती स्वतंत्रदेवता, पण सहन केले किती आम्हा पाई 

अशी उलघडली मला आज आई

आईची ही रुपे किती न किती ही नावे 

तरी कशी असते ही आई, हे कुणाला न ठावे 

आईचे मन जणावाया, आयुष्य हे पड़े तोकडे 

आई ना ती मिळे कधी अशी, 

किती जरी खर्चीले रोकडे

मग, आई म्हणजे काय? 

आई म्हणजे ते फूल जे बाळासाठी खुलत जाते, 

फुलत जाते स्वतः कोमजले तरीही आयुष्य बाळाचे सुगंधितच करते

म्हणुनच मी म्हटले होते सुगंध पसरवित अशी उमलते जाई 

तशीच उलघडली मला आज आई 

तशीच उलघडली मला आज आई

- रेश्मा हरचेकर-नारखेडे